Oubaas Lesch (1ste posisie), Sihan Toua (2de) en die vorige punteleier, Johan van Romburgh (3de) is die Overberg Hengelklub se nuwe voorlopers na afloop van Saterdag, 27 Mei se kompetisie.
Oubaas en Sihan, wat nie ver agter Johan was nie, het seker gemaak hulle slaan munt uit die handbesering wat hy opgedoen het.
“Johan het ongelukkig vergeet die vis moet gevang word en nie hyself nie,” vertel Frans Claassen (voorsitter) met die tong in die kies.
“Hy het ‘n ongemaklike wond aan sy hand opgedoen toe hy homself met die eerste gooi van die oggend met die hoek gehaak het. Nou wonder ek net of dit aan ‘n bietjie senuweeagtigheid oor die paar manne wat kort op sy hakke was, toegeskryf kan word.”
Frans beskou die kompetisie as suksesvol, ondanks die rooigety wat die vis skaars gemaak het. Hy sê hulle het hoofsaaklik oos van Franskraal, in die rigting van Rietfontein, gehengel.
Gelukkig is ‘n paar mooi galjoene, ‘n pragtige steenbras, hangbergers en kolsterte gevang.
Na die hengel was dit rugbytyd en daar is ‘n “Pawiljoentjie” by die klubhuis “gebou”. Die Stormers het egter teleurgestel.
Die gesellige prysuitdelingsfunksie het gesorg dat die Stormers gou vergete was.
Die OK Liquor Store prys vir die grootste vis is deur Oubaas Lesch gewen, asook die Fish Fever prys vir die kampioen van die dag. Die Gansbaai Elektries prys vir die reserwe kampioen is deur Louis Otto gewen.
Daarna is daar tot “ounag” toe gebraai en saamgekuier, met talle stories oor “daai” grote wat weggekom het!
