Gansbaai skole maak geskiedenis

Donderdag, 22 Junie 2017 was ‘n geskiedkundige dag vir Gansbaai se 4 skole.

Op uitnodiging van Masakhane Primary School se waarnemende skoolhoof, mnr Tommy Volkwyn, het die skoolhoofde van Gansbaai Academia (mnr Tommy Wilson), Laerskool Gansbaai (mnr Eben van der Merwe) en Gansbaai Primêr (mnr Neil Pedro) ingewillig om saam met hulle onderwyserskorps ‘n informele besoek aan Masakhane Primary School te bring - in totaal sowat 95 onderwysers.

“Die rede waarom ek vandag se bymekaarkom van die skoolhoofde en personeel van die ander drie skole geïnisieer het, was vir ‘n besigtigingstoer deur Masakhane se nuwe skool, maar ook vir interaksie tussen die skole, wat waarskynlik ‘n eerste keer in die bestaan van Gansbaai se skole is,” het mnr Volkwyn gesê.

Die groep het spontaan by mekaar aangepas en die besoekende skole se hoofde en onderwysers was verstom oor wat hulle alles gesien het.

Na afloop van die besigtigingstoer is verversings saam geniet en kon daar gesellig tussen die 4 skoolhoofde en onderwysers saamgekuier word.

Mnr Tommy Volkwyn, skoolhoof van Gansbaai Primêr is tans waarnemende skoolhoof van Masakhane Primary School en mnr Neil Predo die waarnemende skoolhoof van Gansbaai Primêr.

‘n Geskiedkundige oomblik met al 4 Gansbaai se skoolhoofde bymekaar tydens die bekendstelling van Masakhane Primary School aan die ander skole. Van links mnre Eben van der Merwe (Laerskool Gansbaai), Tommy Volkwyn (Masakhane Primary School), Tommy Wilson (Gansbaai Academia) en Neil Pedro (Gansbaai Primêr).
Net so ‘n geskiedkundige oomblik soos met die 4 skoolhoofde bymekaar, was die teenwoordigheid van ‘n groot getal onderwysers van Gansbaai Academia, Laerskool Gansbaai en Gansbaai Primêr tydens die besoek van Gansbaai skole aan Masakhane Primary School.
GansbaaiCourantNew_1499417951